SELAMAT HARI GAWAI 2011

Sa, dua, tiga, empat, lima, enam, tuuujuh!

Enda ku busung ngelangkah gunung,

Enda ku tulah ngelangkah tanah,

Enda ku danjan ngelangkah bulan,

Enda ku tumbang ngelangkah remang,

Laban kaki ku bediri segi batu angong,

Pala tata lala minyak duyung,

Jari kanan ku genggam cendawan besi belumpung,

Jari kiba genggam sua manuk sabung,

Mulut ngetup silup besi selumpung,

Lengan tanggam simpai kurung betikung,

Belakang tinggang mang bajung burung,

Aku tu ukai mungkal ukai nanjal,

Ukai nerantang ukai nengkebang,

Endang niti endang nali,

Baka ijok tampung penduk,

Baka wi tampung tali,

Baka rutan tampung danan,

Baka ira tampung lemba,

Pecah periuk tanah, ganti periuk tani,

Padam bulan ganti matahari,

Pambu sida ke tuai ganti kami ke dudi,

Laban 1 haribulan 6 tu ila Gawai Dayak deka nyadi,

Nitih ke pekat diadu ke tuai bansa kami,

Dikelandik ke orang matak pemansang muai kelesi,

Ngasuh bansa badu merinsa lantang senang nguan negeri.

Ohhaa...

Nya baru aku ngagau ke Aki Lang Sengalan Burung,

Aki Jugu Menaul Tuntung bidok linggar natar disenggal gumbang besabung,

Belang Pinggang ke belang nyembayang punggung,

Surong Kempat ke berarat muting jelatung,

Bui Nasie ke berumah di tisi lambur gunung,

Antu Abu ke datai ari Munggu Gulu Puchung,

Bunsu Buau ke datai ari rantau dalam kampung,

Sida ke di Panggau Libau, lendat dibiau takang isang,

Sida ke di Merawa Lama munyi ke berimba bung nebang,

Orang Gelong batu nakung nyingit nyingung beliung kabang,

Engkeranji Padi menua ke sigi richah rami munyi negeri mayuh orang,

Kita ke ngabang bakanya mega,

Anang tubuh puang tubuh sebatang,

Anang mai tubuh murus tubuh untus,

Tang datai mai ubat serangkap genap,

Mai batu teruba nemu,

Mai pengaruh gembar tuboh,

Batu Bintang ngambi ka terang mandang nyuluh pemetang,

Batu Uras ngambi ka raja kaya badu merinsa dibaruh orang,

Tanduk rusa ke penunduk mai sempekat badu beperang,

Taring Uting ngambi ka kebal nadai belaya bejai pangan,

Batu Pangkor ke pengering rajin gawa mai pemansang,

Imbai Sempandai ngembuan runding landik bedagang,

Rajut Penemu kena sekula tinggi pelajar tau tepang,

Laban aku tu ukai ngangau ngapa ngangau pia,

Aku ga mai kita datai ngabang datai mansang,

Mai makai mai nandai, mai piring mai ading,

Mai keresa bemban wi, penganan ke alas nyawa, Tuak ke basu kaki,

Nya alai, aku minta tulung minta sukung,

Minta chelap minta embap,

Gayu guru lantang senang nguan menua,

Ngambi ke kitai udah ke ngintu Gawai tu ila,

Bulih ringgit betambah jereki, jelai rita manah nama,

Bekebung baka langit betuchung baka bukit,

Terang baka bulan, tampak baka bintang,

Ia ke tuai umur panjai nguan menua,

Ia ke biak gagit ati rajin sekula,

Bulih degree pangkat Dr.,

Ia ke bujang ampit sida ke dara,

Ia ke indu enda runggu beranak tiga,

Gayu ko Sentuku, gerai ko Sempandai.

SELAMAT HARI GAWAI 2011!