JAKU ANSAH 2010

Nyadi tu digela aku,
Ai takang tunjang teberu terutu jemu ujan nyaya,
Ai buah apung sepugu keberai nadai lepa,
Ai tusu tanah ladu beri antu Bunsu Sempandai,
Ai tambak bukau galak tumbuh sekeradak keruang sungai,
Ai sepeta bunga jawa tumbuh di nanga kerapa melai,
Sua enjok suka tendok,
Datai ari teluk baya Bebangai,
Suruh anjung Burung Ketupung,
Surung anjung Burung Beragai,
Lalu dianjung Bujang Lempong ngagai landung tanah landai,
Ujak pulut lemak ujak selepak buloh balai,
Nyau kelama, peda nyadi deh,
Belayan padi ari kaki sampai serarai,
Peda mansang padi bangang nunda segang pasang lemai,
Peda buah padi mudah udu manah besai tangkai,
Lalu diambi Dara Sanji isi ngagai lanji tikai kemebai,
Simpan Dara Rawan dalam pelawan tajau rawai,
Tutuk Dara Gawuk ngena ceruk ngambi ka nyamai,
Pelaki Dara Mereti ngena ragi ulih meli tumpuk kedai,
Dipulah Seripah Dayang Ani, bini dudi Patinggi Ali Datuk Intai,
Dia ia lalu disimpan sida dalam kutak begambar singa,
Ditaruh sida teguh-teguh di supermarket kedai cina,
Lalu dibeli Bujang Wi ngena duit pala raja,
Nyadi diatu ia dipeda kitai nerachah mua bala,
Laban Ai Brandy campur Whisky aku tu,
Endang sigi pama pemadu-madu ia bisa,
Teleba ngerebah ka jelu gajah begading dua,
Kena sida ka bujang belaban bungah enggau sida ka dara,
Lebuh ka besemaya di kebun bunga muzium negara.

Tang ka saritu tadi,
Ia dikena aku ngansah terinting puting dabung seleka,
Enggi kita wai akan,
Ka terengkah di blog aku sapit tikai anyam tiga,
Ngambi ka seregah kita taing-taing inggar didinga,
Munyi pusin bilun terebai enggi Sultan tuan Raja,
Kena ia pulai ari matau menua,
Aku ga meda pala kita nyau repa ulih idea pukul rata,
Meda belakang nyau bebendang tinggang seludang baju kasa,
Punggung nyau penuh laban gelung rajut bisa,
Meda lengan nyan enteran sangkuh temaga,
Baju udu badas sempama kain permaidani sutera.

Gaga meh aku serta gagit,
Nyingkang ke bulang kaki chawit,
Miau kita ngena selanjau ijau manuk Kunchit,
Aku ga miau semang kita ari belakang mulai ka tumbit,
Ngambi ka Yang tinggi kita enda kudi ngeransi mimit,
Laban aku tu ukai biau sengapa ukai pia,
Tu ga endang nunda Aki kami Apai Sabit Bekait,
Bujang Ancung Selung Bebelit ngetan ka pintu kota langit.

Nya alai nyau lelak kenu tudah aku di selepak ujung jari,
Miau kita enggau selanjau ijau manuk Lelaki,
Nunga kita ka kemumuk duduk bebandi,
Ba kerembai tikai anyam bediri,
Meda pakaian kita chukup manah udu rami,
Style baru putung tukang cina Miri,
Jangkuan kita tanggam jam tali luji,
Manuk tu meh kena aku miau semua kita ke lelaki,
Ngicha kita udah di biau aku,
Enggau selanjau ijau manuk Tawi tu lagi,
Pagila lusa ke dudi ari,
Pandai kita nya sekula abis Degree bulih Master bisi PhD,
Sida ka kerja kebun tulih ka puli mayuh jereki,
Kaban perintah arap ka ransing ngemaju bansa ngelui ari,
Chukup maya rebak baru megai menua nyadi menteri.

Naka penyuma aku nelenga ka rasa dabung kelabu,
Miau kita enggau selanjau ijau manuk Indu,
Nunga kita ka beketunga duduk empuru,
Ba kerembai tikai sapar rampu,
Manuk tu meh kena aku miau kita ti dara enggau ke indu,
Meda buk panjai kita tak lepai-lepai mulai ka dagu,
Mua tampak kita nyau radak-radak udu tampak baka telu,
Umba baju style baru bedabung iku,
Ngicha ka kita nya ila tauka diatu,
Pegari nama suah dikejaku,
Laban kita tu meh endang sempama Kumang Jawai dulu,
Dikeran ka orang kin kitu,
Mentas pendiau serta landik pengawa indu.

Lama ga meh kaki aku udah bediri kasak-kasak,
Miau ka selanjau ijau manuk Bejalak,
Nunga kita ka kemumuk duduk betapak,
Nasit manuk tu manah mimit peda aku,
Bisi dunggul silai tiga beserak,
Meda pakaian kita nyau melan-melan nyau kechirak,
Betanchut redam bebaju burak,
Nya alai manuk tawai luan pirak tu,
Kena aku miau sida ka anembiak,
Diatu amat meh sida nya agi mit lachit serta biak,
Tang ka dudi ari pagila lusa sapa nemu,
Engka sida bisi kenyap,
Dimbai Sempandai seduai Pandak Segatak,
Berani ati panjung nyeradak,
Nan ke pulau menua Sarawak,
Tan berujan ka leka meriam kempang betimbak,
Gagit bepekit ngemaju ka diri belajar berentak,
Mali sumbung kaban sekampung,
Nadai kepapas bela bebatak,
Nya baru gaga Petara Aki Petara Ini,
Meda peturun sama mansang angkat enchelak,
Amat gayu kenu Sentuku, gerai ko Sempandai,
Selamat Tahun Baru 2010!