DITEMU BUAH ARI LANGGU, DIKELALA BANSA ARI JAKU

Tu karang aku ti keterubah dalam Jaku Iban dalam blog tu. Nya alai, enggau awak ka bisi, aku ngelalu ka semua bala kita ka mansa ruai aku tu ngena leka biau baku ka di baruh tu.

Oohhaa..

Sa, dua, tiga, empat, lima, enam, tuujuuhhh...

Enda ku busung ngelangkah gunung,

Enda ku tulah ngelangkah tanah,

Enda ku mati nyenggai ari,

Enda ku parai nyenggai lemai,

Laban aku tu ukai mungkal ukai nanjal,

Ukai nerantang, ukai nengkebang,
Aku tu endang niti endang nali,
Baka ijok tampung penduk,
Baka rutan tampung danan,
Baka ira tampung lemba,
Baka wi tampung tali..
Pecah periuk tanah ganti periuk tani,
Parai orang ka tuai, ganti tubuh kami,
Pambu orang ka dulu, ganti kami ka dudi.

Nya alai tak baka ka luba-luba meh tudah aku tu tadi,

Ngerintai ka jaku, ngelulu ka diri,

Ka aku enda nya tadi,

Endang sigi pendiau kitai ka bebuti,

Berambu kaban belayan, beripar diri menyadi.

Nya alai enti nyema leka enggi aku tu,

Lesi bebadi nadai menuku enda meruan,

Anang guai ga bala kita

Beguai angkat berambi ka penyuran,

Enti nyema penemu tudah aku tu

Bisi pabu enda dalam,

Anang guai ga bala kita tak lalu begaut

Angkat jari bekedar ke lengan.

Ooohhaaa...

Kinda-kinda jari kiba tunjuk antu,
Kena ku miau enggau selanjau ijau manuk Sidu,
Miau kita ti bekadunga duduk nunggu,
Meda mua kita tak semuka bulu seribu,

Dikena aku ngelalu ka kita pengabang lumur satu,

Kelebih agi sida ke tuai dulu nemu,
Kita ka udu badas cukup beradu,
Meda pakaian kita tak melan-melan cukup lagu,
Meda tancut manah cerut umba baju cura biru,
Meda pisin nyau licin manah sugu,
Jengkuan tak melan-melan

Tangan jam ka segenda pukul satu.

Lalu udah kita tu lalu lagi,

Duduk nunga sejam dua,

Nyerumba ari ka abis ibun cukup maya,

Nya baru terinting puting dabong panjai,

Enggi kita nya lagi unggal wai,

Nyau taing-taing munyi pusin enjin bilun terebai,

Enggi Sultan Raja Brunei,

Kena ia nemuai jampat pulai mali dudi.

Agi ga aku miau kita

Enggau selanjau ijau manuk pungga laki,
Maya kita ka diau jenuh

Nunga komputer jenama Sony,
Datas meja belakang TV,
Meda pakaian kita tak melan-melan manah pegari,
Meda setail baru manah gaya diimport ari nengeri,
Meda jangkuan tanggam jam tali luji.

Nya alai, manuk tu dikena aku miau

Semua bala sida lelaki,
Ngambi ka sida pagila lusa, ka dudi ari,
Bulih reta maioh degree,
Dikelandik ka orang jelai rita bisi pemisi,

Nadai agi merinsa nguan dunya dudi ari.

Nyau enggai kenu aku

Ngelengka ka manuk burik kelabu,
Miau kita enggau selanjau ijau manuk rintu,
Maya ke belelak ambis nyumai duduk empuru,

Merindang ati endang sama bekelulu,

Meda pakaian kita

Tak melan-melan cukup ngaku,
Meda buk panjai kita

Tak lepai-lepai mulai ka dagu,
Mua tampak kita nyau radak-radak

Udu burak baka telu,
Dia tadi manuk tu kena aku miau,

Sida ka dara enggau semua bala kaban indu,

Ngambi ka kita udah ka lalu kitu,

Enda puntan pendiau, bulih penemu landik bejaku,

Laban sida ka indu endang disema ka kitai,

Baka Dayang Kumang Endu,

Dara Tambun Puji pegari nama jari tau.

Lebuh kaki aku ke bediri kasak-kasak,
Miau ka selanjau ijau manuk Bejalak,
Nunga kita ka kemumuk duduk betapak,
Nasib manuk tu manah mimit,
Bedungul silai tiga beserak,
Meda pakaian kita tak melan-melan nyau kecirak,
Betancut redam bebaju burak.

Nya alai, tu kena aku miau kita ka nembiak,
Diatu amat kita nya mit lacit agi biak,
Tang ka pagila lusa ka dudi hari kitai sama enda nemu,
Nyangka kitai bisi di imbai Bunsu Sempandai,
Datai ari Tatai Punggang Lebak,
Bisi di embing Keling seduai Pandak Segatak,
Berani ati di mua biak,

Ngica ka kita nya ila,

Manah pendiau ngemansang ke Sarawak,
Nya baru kenu ka orang jelan rita Bansa Dayak,

Tan berujan berani mati kena timbak,

Peda bulih ga midul pengingat Bintang Sarawak,

Tanda Iban udu maju bisi serakup ngempung nembiak.